دقة شاكوش ... "لو كنت وزيرآ للسياحة"؟ ... قلم / سعيد الشربيني - جريدة مصر العصرية

جريدة مصر العصرية

سياسية,إجتماعية,ثقافية,اقتصادية,رياضية,فنية-عربية,عالمية,متنوعة,شاملة,تهتم,بنشر,الكلمة,الصادقة,التي تعبر,عن,المعنى,الهادف.

اخر الأخبار

ِِAlexa Rank

Saturday, November 2, 2019

دقة شاكوش ... "لو كنت وزيرآ للسياحة"؟ ... قلم / سعيد الشربيني



مشكلة أى وزير مصرى يشغل وزارة السياحة أنه حاصر الملف كله فى السياح اللى هيجبهم يزوروا الهرم والاثار وشرم الشيخ والفسح وبعض المحميات . وعلى الرغم من اننا بقلنا مئات السنين فى الفلم دا الا اننا مازلنا نحسب نجاح الوزير ب - زيادة عدد السياح وعلى فكرة احنا واقفين عند عدد معين اما أن يزيد قليلآ أو ينخفض ولحد هنا مخنا واقف طيب محدش سأل ليه ؟
دا على الرغم من ان مصر بها العديد والعديد من المناطق والمزارات السياحية التى يمكن لها أن تجلب اليها ثلثى العالم طوال العام يعنى بتكلم فى طفرة اقتصادية سريعة بس الحكاية كلها محتاجة فكر وعقل مطلع وفاهم ما تحويه مصر من كنوز ودا اللى خلاها مطمع للعالم .

- طيب أنا لو كنت وزير للسياحة كنت ممكن أعمل آيه ؟
شوف يا سيدى : أول حاجة كنت هعمل تنشيط سياحى وهجلب شركات العالم تدور معايا فى منطقة - سانت كاترين - على الواح موسى عليه السلام - لأن سيدنا موسى - لم يدخل الى فلسطين يعنى الآمر انتهى به فى هذه المنطقة - وحتى الآن لم يحدثنا عالم ولا مؤرخ ولا كائن من كان أو اجاب عن السؤال الحائر : س / أين الالواح الخمس لسيدنا - موسى - عليه السلام ؟ وما نوعها ؟ وهل هى موجودة بالفعل من عدمه ؟ وما هو تآثير ذلك على كل شركات العالم المعنية بالبحث والتنقيب ؟ وما هو العائد من وراء ذلك ؟ وعلى فكرة الموضوع حظك يا ابو بخيت المهم فن التسويق
يعنى بالبلدى هجيب جميع شركات العالم تبحث عن الالواح وشوف بقى ممكن نلاقى آيه كمان بس العملية محتاجة اعلام متمرس وواعى ومحترف تسويق .

- طيب أنا لو وزير للسياحة : هشوف احنا عندنا كام مزار دينى ممكن يآتى اليه العالم بصرف النظر عن المذهب كل ما يعنينى احصر المزارات وأعمل على تطوير زيارتها وعلى ما اعتقد أن أغلب المزارات ليست اسلامية فحسب لأننى عندما أعمل بقطاع السياحة فالأديان لله
بالبلدى كدا أعمل على تطوير فكر السياحة الدينية واخراجها من حيز التعليب وفصلها عن العقيدة والمذهب ..الخ

- طيب لو أنا وزير سياحة : لازم اسرع فى احياء السياحة النيلية الداخلية . ليه بقى فى ظل الحرب الدائرة على المياه ونهر النيل لابد أن تكون لوزارة السياحة دور كبير فى هذه المرحلة - أزاى - بص يا سيدى : أنا عن نفسى أيام الجامعة كنت فى جامعة المنيا وكنت بعمل أنا وزملائ رحلات من المنيا الى بنى حسن نركب المركب الشراعى لغاية بنى حسن تخيل بقى طول الرحلة الجميلة دى وانت ماشى بين احضان ضفتى النيل يااااااه على الروعة والجمال
عارف دا عمل فيا آيه خلانى اقول زى ما بيقول الرئيس بالظبط - مشكلة المياه حياة أو موت - صح . مهو بعد ما تشوف جمال النيل وروعته وضفافه وتاريخه مش محتاج حد يقول لك مصر وتحيا مصر - انت لوحدك هتقول تحيا مصر بنيلها

غير كدا نكون زرعنا الوطنية الحقيقية وثقفنا اولدنا وعلمناهم يعنى آيه حب وانتماء لا وآيه كمل بقى رحلتك فى المركب الشراعى الى لقصر واسوان - متعة
لا وكمان عملت تحريك اقتصادى داخلى بجانب التثقيف الحضارى والوطنى
وبص يا باشا أصل الموضوع طويل مش علشان كتير الكلام - لا - دا علشان مصر مليانة كنوز بس محتاجة عقول وكفاءات تقرأ وتفكر
وبكرة انشاء الله نفكر مع الوزير ازاى ننشط السياحة فى بلدنا .
والى الملتقى................................
( حمى الله مصر شعبآ وجيشآ وقيادة ...

No comments:

Post a Comment

الصفحات